Izziņoj pretendentu dasaceišonu Latgalīšu kulturys goda bolvai BOŅUKS 2018

2019.goda februara beiguos vīnpadsmytū reizi nūtiks kasgadejuo latgaliskuos kulturys aktivistu i nūtikšonu sasatikšona – tiks padūtys Latgalīšu kulturys goda bolvys “Boņuks”. Kab nūskaidruotu bolvys sajiemiejus teik izsludynuotu pretendentu dasaceišona, kas byus da 2019. goda 10. janvara. Suocūt jaunū bolvys godu desmiti, puormeits “Boņuka” nūlykums i cytugod bolvys sajims 11 latgaliskuos kulturys aktivitatis, nūtikšonys, procesi i personeibys. “Boņuks” vēļ arviņ ir vīneiguo bolva, kurei eipaši izceļ i gūdynoj sasnāgumus i padareitū latgaliskuos kulturys dzeivē.

Da ituo Latgalīšu kulturys goda bolvys “Boņuks” kas gods tyka padūtys vysmoz 18 nominacejis, nu, aizsuocūt jaunu bolvys godu desmiti, “Boņuks” sajiemieju skaits byus 11. Iz prīšku bolvai ari nabyus atseviški izvierzeitu nominaceju, bet pretendentus varēs īsnēgt treis kategorejuos, nu kuru bolvys žureja izavēlēs 10 bolvys sajiemiejus – aktivitatis, personeibys, nūtikšonys, dorbus, bez kuru vysa vaira nabyutu īsadūmojama latgaliskuo kultura 2018. godā. Vīna bolva namaineigi tiks padūta par myuža īguļdejumu latgalīšu kulturys atteisteibā. Pretendentus bolvai kategorejuos “Volūda. Literatura. Publicistika”, “Aktivitatis. Nūtikšonys. Personeibys” i “Audio. Video” var īsnēgt da 2019. goda 10. janvara.

Kas gods Latgalīšu kulturys goda bolvys “Boņuks” padūšonys ceremoneja ir na tik atsavieršona iz īprīškejā godā padareitū, nu ari latgalīšu kulturys aktivuokūs ļaužu, interesentu i atbaļsteituoju sasatikšona. 2019. goda 24. februarī Lagolys viestnīceibys GORS Lelaja zalē bolvys padūšonys ceremoneju muzykali boguotuoku padareis apvīneiba “Latgalīšu Reps”, grupa “Baritoni”, Arņs Slobožanins, etnografiskais ansamblis “Vabaļis”, grupa “Lata Donga”, projekts “Teksasys latgalīši”, “Misters&Nospiedumi” i “Ausmeņa Records” repere Ūga i cyti. Pyrma ceremonejis tīpat Latgolys viestnīceibā GORS kotrys grybātuojs varēs pīsadaleit pruota spēlēs “Aļberts”, kuruos īrosts nūteik Kuorsovā, raugūt atbiļdēt iz ar Latgolu saisteitim vaicuojumim.

Latgalīšu kulturys goda bolvys “Boņuks” mierkis ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejā godā. Bolvys jubileja reizē, kurei nūtyka ituo goda februarī, “Boņuks” tyka padūtys 19. nominacejuos. Bolvys par padareitū, sasnāgumim voi aktivitati latgalīšu kulturā 2017. godā sajieme Raibīs, gruomotys “Gostūs pi Boņuka” i “Kačeiša patmalis”, Viesturs Kairišs, bankys “Citadele” bankomāti latgaliski, Latgolys symtgadis kongress, “Reigys Ausmeņa Kebabs” saiminīks Valters Murāns, Annelis Slišānis projekts #100dečiLatvijai, Latvejis Radejis stuostu cyklys par Latgolys kongresu, Latvejis Radejis kora koncertizruode “Latgales gredzens”, latgaliskūs vierteibu īkļaušona Namaterialuos kulturys montuojuma sarokstā, grupys “Bez PVN”, “Tautumeitas”, “Galaktika”, apvīneiba “Latgalīšu Reps” i Riharda Dubrys oratoreja “Marija”, bet par myuža īguļdejumu latgalīšu kulturys atteisteibā tyka gūdynuots sabīdryskais darbinīks, literats i školuotuojs Aļberts Spuogis i volūdneica Lideja Leikuma.

Aizpiļdeitys dasacejuma anketys bolvai “Boņuks 2018” tīšsaistē voi pa postu Latgolys viestnīceiba GORS gaideis da 2019. goda 10. janvara. Īsnāgtūs dasacejumus izvērtēs latgaliskū kulturvidi voi attīceigū bolvys lauku puorzynūša žureja vysmoz 25 ļaužu sastuovā.

Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. goda bolvu reikoj Latgolys viestnīceibys GORS komanda. “Boņuks 2018” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme i latgalīšu kulturys ziņu portals lakuga.lv.

Bolvu padūšonys ceremonejā kluotyn byut var kotrys grybātuojs. Beleti nūpārkami Latgolys viestnīceibys GORS i “Biļešu Paradīze” beletu sistemuos. Beletu cena 5,00 i 7,00 €.

Dasacejuma anketu internetā var atrast: bonuks.lv un latgalesgors.lv.

Video īsavieršona dasmytuo “Boņuka” ceremonejā ituo goda februarī ite: youtu.be/o0N_npgcJDE

Viesti sagataveja: Edīte Husare, Latgolys viestnīceiba GORS (SIA “Austrumlatvijas koncertzāle”), Marketinga nūdalis vadeituoja, E-posts: gors.vestis@rezekne.lv; edite.husare@rezekne.lv, Mob. tel.: +371 29109924